Vaqtincha olib chiqish (bojxona rejimi) nima?
Erkin muomaladagi tovar bojxona hududidan tashqarida vaqtincha foydalanish uchun olib chiqiladigan bojxona rejimi. Bunda bojxona bojlari va soliqlardan shartli ozod qilinadi, iqtisodiy siyosat choralari qo'llanilmaydi. 37-moddaga ko'ra rejimga joylashtirish shartlari: bojxona organi tovarni identifikatsiya qila olishi; tovar vakolatli organlar nazoratida bo'lsa, ularning ruxsatnomalari bojxona organlari axborot tizimida mavjud bo'lishi; rejimga joylashtiruvchi O'zbekistonning yuridik yoki jismoniy shaxsi yoxud vakolatli davlat organlarida akkreditatsiya qilingan chet ellik shaxs bo'lishi. Olib chiqilgan tovar o'zgarmas holatda qolishi kerak. Kodeksning 39-moddasiga ko'ra umumiy muddat rejimga joylashtirilgan sanadan boshlab ikki yil; shu moddada sanalgan tovarlar uchun (chet eldagi O'zbekiston obyektlari, diplomatik va konsullik muassasalarida foydalaniladigan tovarlar; ijaraga berilgan temir yo'l va havo transporti vositalari; lizing bo'yicha olib chiqilgan tovarlar; eksport kontrakti shartlari bo'yicha kafolat muddati ichida xizmat ko'rsatish va nuqsonlarni bartaraf etish uchun olib chiqilgan tovarlar; Vazirlar Mahkamasi qarori bilan uzoqroq muddat belgilangan tovarlar) bojxona organi muddatni vakolatli shaxs arizasiga ko'ra uzaytirishi mumkin. Muddat oxirigacha tovar qaytarib olib kirilishi yoki boshqa rejimga (masalan, eksportga) o'tkazilishi lozim; aks holda olib chiqishdagi bojxona qiymatidan boj va soliqlar to'lanadi (41-moddada sanalgan ikki holat bundan mustasno: avariya yoki yengib bo'lmas kuch ta'sirida tovarning yo'q bo'lishi; tovar turgan chet davlat organlarining qarorlari yoki mansabdor shaxslarining harakati (harakatsizligi) natijasida tovarning vakolatli shaxs egaligidan chiqib ketishi). 37-moddaga ko'ra quyidagi ro'yxatdagi tovarlar bu rejimga joylashtirilmaydi; kodeks bu ro'yxatdagi tovarlarni faqat reklama, namoyish qilish va ilmiy-tadqiqot maqsadlarida bitta nusxadan vaqtincha olib chiqishga yo'l qo'yadi.
- O'zbekistondan olib chiqilishi taqiqlangan tovarlar
- Chiqindilar
- Elektr energiyasi, suv, quvurlar orqali yetkazib beriladigan tovarlar (neft, gaz), shuningdek yoqilg'i
- Olib chiqilishi kvotalanadigan tovarlar
- Sarflash materiallari va sarf qilinadigan namunalar, xom ashyo, yarim tayyor mahsulotlar, oziq-ovqat mahsulotlari, alkogolsiz ichimliklar, alkogol va tamaki mahsuloti
- Bir marta ishlatish uchun mo'ljallangan tovarlar
Manba: Bojxona kodeksi, 36-modda; Bojxona kodeksi, 37-modda; Bojxona kodeksi, 39-modda; Bojxona kodeksi, 41-modda